Góðan morgun Føroyar fer í vetur eitt legg út í bókmentaheimin, tann nýskapandi bókmentaheimin! Hetta næsta hálvárið verður tátturin “650 orð” nýtt innslag í sendingini. Hvønn hósdag millum 8 og 9 ber til at hoyra nýskrivaðan tekst eftir føroyskan høvund, og hvørja viku kanst tú gera eina roynd at skriva tekstin, sum verður lisin.
M.C. Escher
Í sendingini geva vit tær nýtt hugskot hvørja viku, sum skrivast skal út frá. Vit velja ein av innkomnu tekstunum og lesa hann upp í sendingini vikuna eftir.
Tekstirnir skulu vera heilt stuttir, í mesta lagi 650 orð (uml. 5 min. at lesa upp). Tú velur sjálv/ur formin. Tað kann vera ein stutt stuttsøga, ein hugleiðing, ein yrking, eitt bræv, ein uppskrift, ein vegleiðing, men sjálvandi skal alt vera meira ella minni fiktión.
Tað er loyvt at verða dulnevndur í ”650 orðum”, so at tey smædnu eisini skullu sleppa upp í part, men GMF skal tó kenna høvundan.
Rakel Helmsdal
Rakel Helmsdal, marionettleikari, rithøvundur og undirvísari í skriving í 14 ár, velur tekstirnar og lesur upp. Upplisni teksturin verður ikki altíð bara valdur, tí tað er besti teksturin bókmentaliga, men kanska líka ofta tí, at tað er teksturin, sum hevur tulkað hugskotið á forvitnisligasta, áhugaverdasta ella snildisligasta hátt. Øll hava sín stíl at málbera seg, og so leingi tað ikki er ein tekstur, ið skal á prent, men bara livir í løtuni, hann verður hoyrdur, so kunnu vit loyva okkum eitt sindur av licentia poetica.
Beint undan jólum gera vit eina sending við øllum teimum útvaldu tekstunum og lata lurtarar atkvøða um, hvønn tekst teimum dámdi best. Vinningurin verður kunngjørdur í næstum.